Geisladiskur TRÚBADÚR
Geislaplata Haraldar Reynissonar trúbadúrs. Lög og textar eru eftir hann sjálfan, nema ljóðin Svarta dúfan og Hvítir fuglar eru eftir Davíð Stefánsson frá Fagraskógi. Halli syngur og sér um allan hljóðfæraleik (spilar á gítar og munnhörpu) nema hvað Jakob Smári Magnússon spilar á bandalausan bassa í nokkrum lögum. Haraldur gefur sjálfur út en Japís dreifir. 1.999 kr. 41 mín. Íslenskur veruleiki TÓNLIST Geisladiskur TRÚBADÚR Geislaplata Haraldar Reynissonar trúbadúrs.
Lög og textar eru eftir hann sjálfan, nema ljóðin Svarta dúfan og Hvítir fuglar eru eftir Davíð Stefánsson frá Fagraskógi. Halli syngur og sér um allan hljóðfæraleik (spilar á gítar og munnhörpu) nema hvað Jakob Smári Magnússon spilar á bandalausan bassa í nokkrum lögum. Haraldur gefur sjálfur út en Japís dreifir. 1.999 kr. 41 mín. ÍSLENSKI trúbadúrinn er um margt sérstakur. Hann ferðast milli staða einungis vopnaður gítar og syngur sorglega söngva um íslenskan raunveruleika. Margir hafa fetað þennan stíg og nægir þar að nefna Bubba Morthens, leiðtogann sjálfan. Flestum er þeim mikið niðri fyrir og í ljóðum þeirra kemur berlega í ljós að þeim finnst lífsgæðunum misskipt. Annað vinsælt umfjöllunarefni er stríðsrekstur, sem allir geta verið sammála um að sé fáránlegur.
Halli Reynis er dæmigerður íslenskur trúbadúr og fellur vel undir þessa lýsingu. Á nýjustu plötu sinni, Trúbadúr, fer hann um víðan völl í yrkisefni.Þó er áberandi umhyggja hans fyrir “litla manninum” í þjóðfélaginu sem Alberti heitnum Guðmundssyni var svo tíðrætt um forðum. Það er góðra gjalda vert. “Hann er forstjóri, ég er hans þræll / og hlýði ég honum þá er ég sæll” (Gerðu þetta, gerðu hitt). Í Börn með byssur fjallar hann um stríðsreksturinn: “Því stríðið er enn / og stríðinu stjórna, / stríðsglæpamenn.” Halli er ágætis skáld; notar gjarnan stuðla og höfuðstafi og stundum rím.
Greinilegt er að hann hefur eytt mikilli vinnu í ljóðagerðina og það hefur skilað sér. Lagasmíðar Haraldar eru hefðbundnar; sverja sig í ætt við þjóðlagatónlist og eru flestar ágætar, sumar mjög góðar. Fyrsta lagið, Nótt í Reykjavík, er til að mynda grípandi með frumlegri hljómaskiptingu í viðlagi.Gerðu þetta, gerðu hitt, Brennur guðanna, Svarta dúfan og Börn með byssur eru sömuleiðis fín lög. Einn er sá þáttur á plötunni sem kemur einna mest á óvart; hljóðfæraleikurinn. Gítarleikur Halla er afbragðsgóður og sem dæmi má nefna plokkið í Börn með byssur, Gerðu þetta, gerðu hitt og Svarta dúfan.
Jakob Smári leikur á bandalausan bassa í nokkrum lögum og gerir það vel, en bassahljómurinn er ekki skemmtilegur, minnir á leiðinlegan hljóðgervil. Söngur Halla er til fyrirmyndar; hann er með sterka og lagvissa rödd sem minnir á stundum á leiðtogann, sem greinilega hefur verið fyrirmynd Haraldar í gegnum árin.
Trúbadúr með Halla Reynis er ágætis geislaplata; kannski helst til einlit vegna fábrotinnar hljóðfæraskipunar, en vel þess virði að skella í geislaspilarann í íslenskum skammdegisraunveruleika.
Ívar Páll Jónsson – mbl.is
